លោកជំទាវ ថៃ សុខផល្លីនជាប្រធាននាយកដ្ឋានគ្រប់គ្រងការបោះផ្សាយលក់មូលបត្រនៃនិយ័តករមូលបត្រកម្ពុជា។ លោកជំទាវមានបទពិសោធន៍ជាង១០ឆ្នាំក្នុងការវាយតម្លៃ IPO និងការបោះផ្សាយមូលបត្របំណុល។ លោកជំទាវទទួលបន្ទុកការងារមួយចំនួនក្នុងការអភិវឌ្ឍន៍បទប្បញ្ញត្តិពាក់ព័ន្ធនឹងផលិតផលមូលបត្រ រៀបចំផែនការសកម្មភាពសម្រាប់ការអភិវឌ្ឍទីផ្សារសញ្ញាបណ្ណ រួមទាំងការបោះផ្សាយលក់សញ្ញាបណ្ណបៃតង។ បន្ថែមពីនេះ លោកជំទាវគឺជាសមាជិកក្រុមការងារសញ្ញាបណ្ណបៃតងដែលបង្កើតឡើងដោយ ន.ម.ក. និងក្រុមការងារលើកទឹកចិត្តពន្ធដារក្នុងវិស័យមូលបត្រផងដែរ។ពាក់ព័ន្ធនឹងគម្រោងសញ្ញាបណ្ណបៃតងលោកជំទាវបានជួយដល់ ADB ក្នុងការត្រួតពិនិត្យលើគោលការណ៍ណែនាំលម្អិតស្តីពីការបោះផ្សាយលក់សញ្ញាបណ្ណបៃតងសម្រាប់កម្ពុជា និងបានធ្វើការជាមួយក្រុមហ៊ុនធានាទិញមូលបត្រនិងក្រុមហ៊ុនបោះផ្សាយមូលបត្រក្នុងការលើកកម្ពស់សញ្ញាបណ្ណបៃតងនៅកម្ពុជា។ លោកជំទាវក៏ជាសមាជិកក្រុមប្រឹក្សារបស់ វ.គ.ស.ក. ផងដែរ។

លោក ណា ពៅបញ្ញារិទ្ធ ជាប្រធាននាយកដ្ឋានកិច្ចការគតិយុត្ត តែងតាំងនៅខែមីនា ឆ្នាំ២០២២។ នៅឆ្នាំ២០១០ លោកបានបញ្ចប់បរិញ្ញាបត្រជាន់ខ្ពស់ ជំនាញនីតិសាស្ត្រ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងសកលវិទ្យាល័យលីយ៉ុង ៣ នៃសាធារណរដ្ឋបារាំង។ លោកបានចូលបម្រើ ការងារជាមន្ត្រីជំនាញនៃនាយកដ្ឋានកិច្ចការគតិយុត្ត នៃនិយ័តករមូលបត្រកម្ពុជា នៅក្នុងឆ្នាំ២០០៨។ លោកមានបទពិសោធន៍ ១៧ ឆ្នាំក្នុងកិច្ចការច្បាប់ រួមទាំងការគ្រប់គ្រងពាក្យបណ្តឹង ការដោះស្រាយវិវាទ ការប្រឹក្សាផ្នែកច្បាប់ និងការពិគ្រោះយោបល់ ការស៊ើបអង្កេត និងការអនុវត្តច្បាប់។ បន្ថែមពីលើនេះទៅទៀត លោកមានបទពិសោធន៍ជាសាស្ត្រាចារ្យបង្រៀនមុខវិជ្ជាច្បាប់ជាង ១៥ឆ្នាំ នៅសកលវិទ្យាល័យជាច្រើន។